قصة جميلة عن الصداقة

القصه ان شاب بعد ماتخرج من كليه الهندسه حب يسافر بره.. و فعلا جاتله
فرصه السفر و سافر. احس هناك بالغربه و الوحده لحد ماظهر له واحد
بلدياته اخده معاه و شغله فى الشغل اللى بيشتغل فيه.
و بقوا بيتقاسموا الحلوه و المره. و الفلوس اللى بتيجى من الشغل كانت
بتتقسم بالنص مش على حسب اللى اشتغل اكتر يعنى من الاخر بقوا زى الاخوات
بالظبط..

كبروا هما الاتنين مع بعض و فتحوا شركه صغيره. و الصغيره كبرت. و بقت
مجموعه شركات.
اما اطمن الاول على الاحوال قال لصاحبه انا هانزل البلد اطمن على اهلى .
وافق صاحبه
و نزل و اطمن على اهله و لما رجع و رايح الشركه. دخل المكتب لقى صوره
واحده سبحان من صورها . بنت فى منتهى الجمال دخل عليه صاحبه شافه ماسك
صوره البنت و معجب بيها اوى.

سأله تحب تتجوزها ؟ قاله يا ريت ... بس مين دى؟
قاله البنت دى تبقى خطيبتى و من النهارده متحرمه عليا و هى من دلوقتى
ليك يا صاحبى
صاحبه فى الاول رفض و قاله ماينفعش دى خطيبتك
قاله قبل ماتيجى كانت خطيبتى لكن من دلوقتى هى خطيبتك انتا
من الاخر صاحبه وافق
و فعلا اتجوز البنت دى

بعد فتره الاول قال لصاحبه انه هاينزل البلد و يدير الشغل بتاعهم اللى
هناك
صاحبه وافق
قاله طيب ماتنزل معايا؟؟ قاله انا ماليش حد هناك انزل انتا و اناهادير
الشغل من هنا
وافقوا هماالاتنين على الاقتراح ده و بالفعل نزل الاول و ادار شغلهم اللى
فى بلدهم
و فجأه بدأ التانى اللى فى الغربه يخسر و يخسر لحد ماخسر كل اللى عمله..
مالاقاش قدامه اى حاجه يقدر يعملها غير انه ينزل لصاحبه اللى فى البلد
عشان يساعده يبدأ حياته من جديد . كانت حالته تصعب على الكافر

المهم نزل لصاحبه. و بالصدفه قابل صاحبه فى الشارع و قرب عليه
اول اما صاحبه لاقاه جاى نحيتهم بالمنظر ده . اخد زوجته بالسرعه على
العربيه و مشيوا
صاحبنا ماقدرش يستحمل اللى عمله صاحبه فيه بعد ما وقف جنبه و كبره فى
غربته و كان بيعامله زى اخوه . و قعد يبكى فى الشوارع.

بعد كام يوم صاحبنا لقى راجل عجوز اوى بيقوله مالك يابنى؟
حاكاله على اللى حصله
العجوز قاله انتا باينك راجل ابن حلال يا بنى
ايه رأيك تيجى تمسك الشغل عندى ؟
صاحبنا فرح
اخيرا فى شغل هايقدر يعيش منه و ممكن يبتدى حياه جديده من جديد
بعد سنتين يموت صاحب الشغل بعد مايكتب كل حاجه لصاحبنا

كل حاجه بقت ملكه .
و حاول صاحبنا بجميع الطرق انه يرد الجميل لاهل الراجل اللى ساعده .
و فى يوم دخلت عليه زوجه الراجل و قالتله
انا حاسه انى هاحصل جوزى يا بنى و عايزاك تتجوز بنتى عشان لو انا مت مش
هاتلاقى اى حد يقف جنبها و انا مش هالاقيلها حد احسن منك
صاحبنا وافق و قالها بس على شرط
سألته ايه هو؟
قالها انا عايزك تعزمى الراجل ده على فرحنا
( الراجل ده هو صاحبه الاولانى اللى خانه)
الست وافقت و فعلا عزمت الراجل اللى هو قال عليه
و فى يوم الفرح
و اول مالقى صاحبه داخل وقف الموسيقى و هيصه الفرح و مسك المايك و قال

سلام لصاحبى
سلام لصاحبى اللى فى غربته اعتبرته زى اخويا
سلام لصاحبى
سلام لصاحبى اللى فى كنت بتقاسم معاه فى المره قبل الحلوه
سلام لصاحبى
سلام اصاحبى اللى حرمت على نفسى خطيبتى عشان خاطر عجبته و خليته يتجوزها.
سلام لصاحبى
سلام لصاحبى اللى اول مالاقانى خسرت بعد عنى و اخد عربيته و جرى بعيد عنى
سلام لصاحبى
قال الكلمتين دول و سكت و قال للفرقه تكمل غنا
قبل مالفرقه تكمل غنا صاحبه اخد المايك و قال
سلام لصاحبى
سلام لصاحبى اللى اول ماشفته بعد خسارته بعدت انا ومراتى خفت على شعوره
عشان مايحسش انه بقى تحت و انا فوق
سلام لصاحبى
سلام لصاحبى اللى بعتله ابويا عشان يشغله عنده من غير مايقوله عشان
مايحسش انها صدقه
سلام لصاحبى
سلام لصاحبى اللى خليت ابويا يكتبله كل حاجه قبل مايموت عشان يبدأ من
جديد
سلام لصاحبى
سلام لصاحبى اللى بعتله امى تطلب منه انه يتجوز اختى عشان مااحسسوش انه
لسه اقل منى



اتمنى اخد العبرة منها